Lotu gure sokara lagundu

x
LAGUNDU

FRANTZISKO XABIERKOAEN BURUAREN BERRAGERPEN BITXIA

FRANTZISKO XABIERKOAEN BURUAREN BERRAGERPEN BITXIA Argitaratuta: 01-05-2023
FRANTZISKO XABIERKOAEN BURUAREN BERRAGERPEN BITXIA
Frantzisko Xabierkoaren brontzezko estatuaren burua, 1985az geroztik galduta zegoena ankerren batek Hiru Erregeen Mahaiko gailurretik kolpeka bota zuenetik, modu misteriotsuan agertu berri da, 38 urteren ostean.

Apirilaren 24an, astelehena, identifikatu ez zen pertsona batek kaxa bat eman zion Mendi eta Eskalada Kirolen Nafarroako Federazioko zuzendarietako bati. Barruan zer egongo, eta santuaren burua, hainbeste urtez galdutzat emanikoa.

Pieza hori Nafarroa Kirol Elkartearen eskuetan dago orain, hain zuzen ere erakunde horrek ipini baitzuen estatua Nafarroako Pirinioetako tontor hartan 1955ean.

Xabierko santuaren irudia, garaieran 80 cm ingurukoa, askoz ere luzeagoa zen beste baten ordez jarri zuten. Lehengo hark bi metrotik gora zituen, eta Nafarroa Kirol Elkartearen ekimenez jarri zuten hura ere, leku hartan bertan, 1952ko abuztuaren 16an. Urte hartako neguan bertan, ordea, ekaitzaldi batean, tximista batek hondatu egin zuen estatua erraldoi hura. Belaguako Fidel Gorria artzainak aurkitu zuen burua, hilabete batzuk geroago, eta Nafarroa Kirol Elkarteari eman zion. Gaur egun, haren egoitzan dago ikusgai.

Jarautako elkarteak erabakiko du orain zer egin brontzezko buru agertu berriarekin; hots, hormigoizko garai batekoaren ondoan ipini edo beste lekuren batean jarri. Argitu gabe geratu da nork eta zergatik entregatu zuen, eta non egon den gordeta halako pieza historikoa ia berrogei urtez.


BERRI GEHIAGO