TXIMIST 1974 ESPEDIZIOAREN ERAKUSKETA, 50 URTE GEROAGO
1974ko Everesteko Tximist espedizioa mugarri berritzailea izan zen euskal mendizaletasunean. Juan Celaya enpresaburuak osorik finantzatu zuen, eta Everesteko gailurrera iristeko oso hurbil egon zen. 1980ko maiatzean munduko gailurrik altuenean ikurrina jartzea lortu zuen espedizioaren lehen urratsa izan zen, eta euskal alpinistek Himalaiako mendi handietara egindako erromesaldi luzearen hasiera ekarri zuen.
Abentura haren berrogeita hamargarren urteurrenean, EMMOAk atseginez eskaintzen du gure alpinismoari mendi handien mundua ireki zion espedizio honi buruzko erakusketa.
20 panelek osatzen dute, erakusketako une esanguratsu bakoitzaren argazki eta azalpen elebidunekin. Horrez gain, Juan Ignacio Lorentek tamaina handian egindako Everesteko maketa, espedizioko kideen ekipamenduarekin jantzitako hiru maniki eta espedizioaren zein Nepalen oroigarri diren hainbat objektu —horietako batzuk oso hunkigarriak— daude ikusgai.
Erakusketa Gasteizko Amarica aretoan bisita daiteke, espedizioa sortu, finantzatu eta antolatu zen hirian, hain zuzen ere. Ekainaren 27an inauguratu zen eta uda osoan egongo da ikusgai, abuztuaren 31ra arte.
Ordutegia hau da: asteartetik ostiralera 18:00etatik 21:00etara; larunbatetan 12:00etatik 14:00etara eta 18:00etatik 21:00etara; igande eta jaiegunetan 12:00etatik 14:00etara; astelehenetan itxita.
EMMOAk eskerrak eman nahi dizkie Amarica aretoko langileei eta erakusketa hau zein hilaren 21ean Europa Biltzar Jauregian espedizioari egindako omenaldia posible egin duten gainerako erakundeei: Arabako Foru Aldundia, Vitoria-Gasteizko Udala, Vital Fundazioa, Euskadi Basque Country, Laboral Kutxa, Juan Celaya Fundazioa eta aurten bere mendeurrena ospatzen ari den Euskal Mendizale Federazioa.
