Olaguibel Saria 2020 jaso dugu, Euskal Herriko Arkitektoen Elkargo Ofizialaren Arabako Ordezkaritzak ematen duena, Gasteizko Zabalgunearen erakusleihoetan Ensanche XIX Elkartearekin batera antolatutako #MendianGora erakusketagatik.
Ordezkaritzako presidenteak, Jimena Ruiz de Landak, Pablo Ezquerrak egindako estatuatxo bat zen saria eman zien Andrés Iturralderi, Ensanche XIXeko presidenteari, eta Txomin Uriarteri, EMMOAko presidenteari. Horrekin hiriaren birsorkuntzari egindako ekarpena aitortzen da, aldi baterako hutsik dauden merkataritza-lokalak aktibatzen dituen eta egungo garaietarako oso egokia den formatu batean balio kulturala ematen duen proiektu baten bidez.
EMMOAtik eskerrak eman nahi dizkiegu COAVN Arabari sari honengatik eta proiektu honetan lagundu duten pertsona eta erakunde guztiei: Fotoprixi, antolakuntzaren parte izan baita; Urteim eta Vallejori, lokal hutsak utzi dituztelako; Laboral Kutxari, babesle izan delako; eta EMMOAri objektu historikoak utzi eta eman dizkieten mendizaleei. Mila esker guztioi!
